Í morgun fékk ég staðfest það sem mig hefur lengi grunað - að sá kolbrjálaði niðurrifs- og skattaóði stjórnmálaflokkur sem kallar sig Vinstrihreyfinguna-grænt framboð sé hreint ekki jafn umdeildur á meðal landsmanna og virst hefur undanfarið.

Mér hefur nefnilega liðið, í miðjum grátkór atvinnulífsins, hægribloggsins og stjórnarandstöðunnar, eins og nær allir landsmenn hefðu á undraskömmum tíma misst trú á ríkisstjórn Vinstri-grænna og Samfylkingar.

Þannig hefur það hljómað á köflum.

Svo birtist þessi ánægjulega skoðanakönnun Fréttablaðsins í morgun þar sem ríkisstjórnin heldur rækilega velli og VG bætir myndarlega við sig fylgi. Heil 24,6% landsmanna segjast myndu kjósa flokkinn.

Hvað segir þetta okkur?

Að eitthvað sé verið að gera rétt. Að niðurstöður síðustu kosninga hafi endurspeglað nýjan veruleika í íslenskum stjórnmálum. Að þrátt fyrir ofurviðfangsefnin ESB og IceSave, sem reynst hafa stjórnarflokkunum einkar erfið, trúi landsmenn því að þetta sé besta stjórnarformið.

- - - -

Er þetta brött túlkun? Það mætti hugsa sér það. En horfum samt á eftirfarandi: VG fékk 21,7% fylgi í kosningunum. Í síðustu skoðanakönnun fékk flokkurinn 19,2%, sem mér þótti líka harla vel sloppið miðað við átök sumarsins. Og að síðustu er ekki úr vegi að horfa á fylgi flokksins í Reykjavík skv. könnun Capacent frá því í desember. Þar er fylgið 21% og í sögulegu hámarki.

Er þá óvarlegt að líta svo á að fastafylgi Vinstri-grænna liggi í kringum 20% og geti á góðum degi slagað upp í 25%?

- - - -

Könnun Fréttablaðsins þann 7. janúar 2010.

Könnun Capacent í Reykjavík þann 4. desember 2009.Villta vinstrið er þá kannski ekki svo galið eftir allt saman?

Ég fór norður í land fyrir viku og sótti tvo fundi með Steingrími J. Sigfússyni, einn hjá VG á Akureyri og hinn síðari hjá VG á Húsavík. Þetta voru góðir fundir og jákvæðir, og sérlega lærdómsríkt fyrir mig sem nýjan þingmann að fara í beint samtal við fleiri félaga flokksins en hér á höfuðborgarsvæðinu. Að auki á ég ættir að rekja til Akureyrar og í Hörgárdalinn, dvaldi þar mikið sem barn og unglingur, og þótti því vænt um tækifærið.

Síðari fundurinn, haldinn í Kirkjubæ á Húsavík, reyndist hins vegar mjög afdrifaríkur - þó ekki eins afdrifaríkur og hefði getað orðið.

Rétt í þann mund sem fundur átti að hefjast dýfði ég dýrindis sykurmola í kaffið mitt og dengdi honum upp í munn, eins og lög gera ráð fyrir. Eitthvað hef ég verið að flýta mér, því að bráðnaðir hlutar molans festust á undarlegum stað í hálsinum og ollu smáræðis óþægindum. Ég stóð upp og gekk fram til að ná mér í vatnsglas, en þá jókst á vandann og hálfur sykurmoli fylgdi sömu leið.

Ég stóð á öndinni - reyndi ítrekað að ná andanum, án árangurs. Uppi varð fótur og fit, en svo stóð upp af stóli sínum fallega skeggjaður rólyndismaður, greip fagmannlega um mig og tók mig Heimlich-taki undir þindina. Hann þurfti einar þrjár tilraunir áður en bölvuð sætindin hrukku upp úr mér og flugu niður á gólf.

Nú ætla ég ekki að yfir-dramatísera þessa lífsreynslu og segjast hafa átt svokallaða „near death experience“. En að vera í þeirri stöðu að geta ekki andað var skelfilega óþægilegt. Og hrollurinn fylgdi mér inn í nokkra næstu daga. Og er kannski í mér enn.

Kannski er hægt að kalla þetta „near-near death experience“? Bara svona til að grínast með smámál eins og andardrátt, lífið og dauðann?

Allir sem vilja geta séð að undanfarnar vikur hef ég verið orðlaus, í þeirri merkingu að ég hef ekki skrifað stafkrók á netið um pólitík frá því rétt eftir kosningar. Þetta helgast af tvennu: Kosningabaráttan gekk mjög nærri mér og ég gaf henni eiginlega allt sem ég átti. Krafturinn kláraðist.

Hin ástæðan er sú að síðustu vikur hefur VG gengið í gegnum erfiða tíma, svo erfiða að í dag, þriðjudaginn 11. ágúst, birtir Fréttablaðið á forsíðu sinni fyrirsögnina: „Líf ríkisstjórnarinnar í höndum Ögmundar.“

Hin langþráða vinstristjórn, sem var mynduð í maí, hangir á bláþræði, að því er virðist.

Af hverju?

- - - - - - -

Tónninn í mörgum bloggaranum (og þeim áróðursmeisturum sem kommenta nafnlaust í athugasemdakerfi hér og þar og alls staðar) er á þá leið að vinstriflokkarnir geti ekki unnið saman; að VG sé ekki stjórntækur; að þetta sanni hið fornkveðna að vinstrimennska sé ávísun á glundroða og stefnuleysi.

- - - - - - -

Þetta er afar ósanngjarn tónn í ljósi aðstæðna. Við erum ekki að tala um nein eðlileg og hversdagsleg málefni sem lenda inn á borðum stjórnmálaflokka í venjulegu árferði. Við erum að tala um neyðarástand og skaðastjórnun af kalíberi sem engin íslensk ríkisstjórn hefur staðið frammi fyrir. Ef vinstristjórnin væri að liðast í sundur því hún kæmi sér ekki saman um stefnu í t.d. málefnum öryrkja, umhverfismálum eða samgöngumálum þá væri ég sjálfur til í að taka undir glundroðagagnrýnina.

- - - - - - -

Hver eru þessi stóru mál sem hrista flokkinn og ríkisstjórnina?

1) Bankahrunið og almennar afleiðingar þess - VG var alla tíð gagnrýninn á þenslu bankakerfisins og vildi ítrekað skilja á milli almennrar bankastarfsemi og fjárfestingarstarfsemi.

2) Aðildarumsókn að ESB - VG hefur alla tíð verið á móti ESB-aðild, en í ljósi hrikalegra aðstæðna eftir bankahrunið og í þeirri viðleitni að ná að mynda vinstristjórn með Samfylkingu ákvað landsfundur VG árið 2009 að opna lítillega á þann möguleika. Þetta hefur eðlilega valdið titringi innan flokksins, enda kusu sumir VG í trausti þess að flokkurinn stæði gegn aðildarumsókn. Meira hefur farið fyrir gagnrýnisröddinni … en hinu má ekki gleyma að mjög margir kusu VG þrátt fyrir ESB-andstöðu flokksins. Þeir kjósendur vildu fyrst og síðast vinstristjórn sem hefur félagsleg gildi að leiðarljósi. Skítt með ESB eða ekki ESB.

3) IceSave-samningurinn - sem er auðvitað einn anginn af bankahruni í boði annarra flokka en VG. Því miður er það þannig að þingmenn og ráðherrar VG sjá þessi mál ekki sömu augum, og sumir eru alvarlega skeptískir, en verður ekki bara að hafa það? Á að krefja þingmenn um að taka „flokkslínuafstöðu“ í mikilvægustu atkvæðagreiðslu Íslandssögunnar? Ef einhver hefur efasemdir um IceSave-samninginn þá á hann auðvitað að vera á móti honum. Á það hefur verið bent að í samstarfsyfirlýsingu VG og Samfylkingar sé talað um að staðfesta IceSave-samninginn. En þar er ekki talað um að staðfesta samninginn með hvaða forsendum sem er.

- - - - - -

Ég er með veikum mætti (og of mörgum orðum) að benda á þá augljósu staðreynd að vinstristjórn VG og Samfylkingar er ekki stofnuð utan um a) bankahrunið, b) ESB-aðildarumsókn eða c) IceSave-samninginn.

Vinstristjórnin var stofnuð til að tryggja að Ísland framtíðarinnar verði byggt upp á jöfnuði og félagslegu réttlæti í stað þess gróðabrjálæðis sem einkennt hefur síðustu ár. VG vissi upp á hár að með því að taka við stjórnartaumunum kortéri eftir bankahrun væri flokkurinn að takast á við gríðarlega krefjandi verkefni. Því blæðir flokknum nú.

- - - - - -

Hér stöndum við í flórnum og getum ekki annað. En hann er ekki okkar, þessi flór. Þetta er uppsafnaður úrgangur úr annarra manna kúm, afrakstur vanrækslu og lélegs aðbúnaðar til margra ára.

En allir sem hafa mokað flórinn vita að það getur verið dásamlega fullnægjandi aðgerð á undarlegan hátt, jafnvel þótt maður eigi ekki kýrnar sjálfur, og jafnvel þótt skíturinn slettist upp á höfuð, herðar, hné og tær, og jafnvel þótt aldrei verði gólfið alveg skínandi hreint, og jafnvel þótt aldrei verði allar kýrnar í fjósinu fyllilega ánægðar með vinnubrögðin og niðurstöðuna.

Þær hafa orðið gleðifregnir að mér býðst að ferðast með Tvískinnu um  Vestfirði í heila viku. Háskólasetur Vestfjarða stendur fyrir Listaháskóla unga fólksins í næstu viku og ég kenni skapandi skrif fyrir 12-16 ára unglinga á Ísafirði, Patreksfirði og Hólmavík.

Þar sem ég er aðeins upptekinn þrjá daga af fimm er ég að hringja í fyrirtæki, skóla og menningarstofnanir og bóka mig inn með stutta fyrirlestra. Þetta er eitthvað sem kalla mætti Sumargleði Tvískinnu 2009, hálfgert tónleikaferðalag, og ef að líkum lætur næ ég að hitta ógrynni af Vestfirðingum á öllum aldri og bera þeim (mikilvægan) boðskap Tvískinnu. Áhugasamir fyrirtækjaeigendur á Vestfjörðum eru hvattir til að hafa samband.

Hér er Háskólasetrið og hér er Listaháskóli unga fólksins!

Sjáumst fyrir vestan!

Nýjasta útspil Sjálfstæðismanna hljómar svona:

Lækkum afborganir af húsnæðislánum um helming.

Hljómar vel, ekki satt?

Jæja, hér er kominn bæklingur VG í Reykjavík vegna forvalsins. Hann er í PDF formi … en ég er að reyna að virkja tæknitröll til að gera hann netbetri … meira síðar.